【HR人品反映公司文化】
我都做過HR，所以冇偏見或針對成份，純粹累積平時啲衰客事跡，同埋求職者覆述嘅經驗。根據非官方統計，個HR如果衰格，間公司都唔慌好得去邊，呢個理論唔係百份百，凡事梗有例外，但都中咗70%以上，一定準過啲乜乜乜星座語錄先。
如果要理性分析，我覺得係個HR平時都受埋唔少氣，所以不自覺發洩喺求職者身上，換言之呢啲公司嘅文化同內部氣氛其實麻麻，試想像下間公司啲同事如果感情好，你返工嗰陣心情自然靚，個HR西口西面，因為佢都受緊罪，以上係經驗話俾我聽，不喜勿插。
以下係隨手拈來嘅3個真實個案，其實唔止咁少，只係唔想打千字文。
=================
衰 HR1號 / 灣仔某美資公司
真實案例: 黃絲唔請(有追開呢個Page應該知我講邊個)
公司實況: 立立亂，辦公室政治問題嚴重，每個月都請人，請完又走，走完又請。
=================
衰 HR2號 / 港島線某間半政府機構
真實案例: 見完求職者採取拖字訣，唔請永遠唔會覆你，淨係識逃避同埋耍太極 (係咪同政府有關嘅機構都係咁架呢?)，即使係請，都拖足個幾兩個月，喂大佬，求職者有腳會走架，人哋都要搵食，唔好以為全香港得你一間公司啦。
**補充少少，佢哋唔係唔覆求職者，係連我哋Agency都逃避，例如話自己未問部門經理feedback，係半個月都未問，而個HR同部門經理係日日喺公司見面。
公司實況: Old Seafood當道，規矩多多，死氣沉沉，成班老屎忽係一世都唔會走，後生嗰班冇個頂得順亦冇可能發圍。
=================
衰 HR3號 / 荔枝角某製衣公司
真實案例: 啲Test要你做一個鐘，但係見求職者只係會用5分鐘，期間黑口黑面兼放蚊，極度唔尊重求職者。
公司實況: 大部份Merchandiser日日OT到10點，有人差半個月攞到雙糧都唔要，谷氣到即時劈炮，公司內部怨氣好重。
=================
你可能會話: 喂，班HR平時受氣關我咩事? 我嚟見工咋喎，何況請人同埋Interview係HR職責，點可以咁唔Pro?
呢堆道理，你知我知大家知，係啲西HR唔知啫。一句到尾，如果見工遇著啲西HR，令你入唔到呢間公司做嘢，唔使唔開心，其實你係行緊運，由得個西HR同班西同事一世累鬥累啦，你唔會係輸家，輸嘅係佢哋，放心！
最後要持平講句，唔係個個HR都衰，我都遇過好嘅HR，而如果你係好嘅HR，我代表其他求職者向你致謝，香港真係需要你哋，千祈唔好俾啲西HR同化。
Search